Ceremonija otkrivanja spomenika našem velikom pjesniku Aleksandru Lesu Ivanoviću održana je danas u Parku pjesnika na Cetinju.

Na prigodnoj svečanosti govorio je gradonačelnik Prijestonice Cetinje Nikola Đurašković, nakon čega je sa gospodinom Božidarom Bonjom Ivanovićem, pjesnikovim sinom, otkrio spomenik.

“Cetinje je grad o kojem je naš veliki Aleksandar Leso Ivanović uvijek pisao, kojim se ponosio i koji je rijetko kada napuštao. U to ime, postavljanjem ovog spomenika dajemo skroman doprinos u očuvanju lika i djela Lesa Ivanovića kao jednog od najznačajnijih pjesnika crnogorske poezije.”, rekao je gradonačelnik Prijestonice Nikola Đurašković.

Autor spomenika je akademski slikar i vajar Zlatko Glamočak, koji se na prigodnoj svečanosti otkrivanja spomen-obilježja Aleksandru Lesu Ivanoviću obratio prisutnima, istakavši da mu je bila posebna čast da izvede ovaj spomenik i zahvalio se prisutnima što su svojim prisustvom uveličali ovaj događaj.

Autorski tekst o pjesniku i njegovoj poeziji pročitala je istoričarka umjetnosti Anđela Ćipranić iz Sekretarijata za kulturu Prijestonice Cetinje, dok su glumci Ana Vučković i Vukan Pejović recitovali odabrane stihove našeg čuvenog pjesnika.